सिआईबीले लियो उद्योगी विनोद चौधरीसँग बयान
काठमाडौं । नेपाल प्रहरीको केन्द्रीय अनुसन्धान व्युरो (सीआईबी) ले बाँसबारी जग्गा हिनामिना प्रकरणमा जोडिएका उद्योगपति एवं नेपाली कांग्रेसका सांसद विनोद चौधरीसँग वयान लिएको छ ।
विहिवार विहान उद्योगी चौधरी विहान आफै रामशाहपथस्थित सरकारी वकिलको कार्यालयमा उपस्थित भएर बयान दिएका हुन ।
हिजो सिआईबीले चौधरीमाथि अनुसन्धान भईरहेको यस विषयमा सभामुख देवराज घिमिरेलाई पत्र लेखेर जानकारी गराएको थियो ।
बाँसबारी छालाजुत्ता कारखाना लिमिटेडको नाममा दर्ता कायम रहेको १० रोपनी जग्गा च्याम्पियन फुटवेयर लिमिटेडको नाममा स्वामित्व हस्तान्तरण भएको थियो ।
चौधरी च्याम्पियन फुटवेयर लिमिटेडका शेयर धनी एवम् तत्कालीन सञ्चालक समिति सदस्य हुन । त्यसबेला विनोद चौधरी, वसन्त चौधरी, अरुणकुमार चौधरी र महेशकुमार अग्रवालको समान २००÷२०० कित्ता शेयर थियो ।
गंगा चौधरीको नाममा १०० कित्ता शेयर थियो । बाँसबारी छाला तथा जुत्ताको नाममा २ हजार कित्ता शेयर थियो ।
२७ कात्तिक २०४३ मा च्याम्पियन फुटवयेर कम्पनी दर्ता भएपछि ५ भदौ २०४४ मा बाँसबारी छालाजुत्ताको ६ रोपनी जग्गा हस्तान्तरण भयो । थप ४ रोपनी जग्गा पनि च्याम्पियन फुटवेयरको नाममा गयो ।
यसरी सरकारी जग्गा गैरकानुनी रुपमा च्याम्पियन फुटवेयर लिमिटेडको नाममा स्वामित्व हस्तान्तरण गरेको खुलेपछि चौधरी पनि अनुसन्धानको दायरामा तानिएका हुन ।
पछिल्लो समय अख्तियार दुरुपयोग अनुसन्धान आयोगसँगै सीआईबीले यसबारे अनुसन्धान थालेपछि १८ माघमा अरुण चौधरीसहित ३ जना पक्राउ परे ।
अहिले उनीहरु धरौटीमा छुटेपनि सिआइबीले अनुसन्धान भने जारी राखेको छ ।
Categorized in राष्ट्रिय
